საქართველოს კურორტების განვითარების სააგენტომ ავსტრიაში სამთო ინდუსტრიის წამყვან კომპანიებთან საქმიანი შეხვედრები გამართა

საქართველოს კურორტების განვითარების სააგენტოს დელეგაციამ ავსტრიის ქალაქ ინსბრუკში მთის ტურიზმის საერთაშორისო გამოფენაზე– Interalpin 2025 მიიღო მონაწილეობა. „ინტერალპინი“ მსოფლიოში ერთ-ერთი მასშტაბური ღონისძიებაა, რომელიც სამთო კურორტებისა და ინფრასტრუქტურის მიმართულებით მოქმედ გავლენიან კომპანიებსა და დარგის სპეციალისტებს აერთიანებს.

„ინტერალპინზე კურორტების განვითარების სააგენტოს მონაწილეობა შესაძლებლობას გვაძლევს, იმ ტენდენციებსა და პრაქტიკებს გავეცნოთ, რომლებიც მთის კურორტებისთვის ახალ სტანდარტებს აწესებს. მოწინავე ქვეყნების გამოცდილების გაზიარება, ახალი კონტაქტების დამყარება და საერთაშორისო პარტნიორებთან თანამშრომლობის გაღრმავება განსაკუთრებით მნიშვნელოვანია საქართველოს საკურორტო პოტენციალის სრულად რეალიზებისა და გრძელვადიანი განვითარებისთვის,“ – აღნიშნა კურორტების განვითარების სააგენტოს დირექტორმა ალექსანდრე ონოფრიშვილმა.

გამოფენის მიმდინარეობისას, კურორტების განვითარების სააგენტოს დელეგაცია მთის კურორტების განვითარების სფეროში მოქმედი 50-ზე მეტი წამყვანი საერთაშორისო კომპანიის წარმომადგენლებს შეხვდა. მათ შორის, შეხვედრები გაიმართა საერთაშორისო საინჟინრო და საკონსულტაციო კომპანია ILF-ის, ალპური კურორტებისა და გასართობი პარკების ოპერატორი კომპანია „დეზ ალპის“, და საბაგირო გზებისა და საბავშვო ატრაქციონების მწარმოებელი კომპანიის – Sunkid-ის წარმომადგენლებთან. მხარეებმა მთის კურორტების დაგეგმვის, ინფრასტრუქტურის განვითარებისა და ინოვაციური ტურისტული პროდუქტების დანერგვის შესაძლებლობები განიხილეს.

სააგენტოს წარმომადგენლები ასევე მონაწილეობდნენ Interalpin-ის 50 წლის იუბილესადმი მიძღვნილ კონფერენციაში, სადაც სამთო ინდუსტრიის ტენდენციების, გამოწვევებისა და განვითარების ინოვაციური გზების შესახებ მოხსენებები ევროპის და ამერიკის წამყვანი ექსპერტებისგან მოისმინეს და თემატურ დისკუსიებში ჩაერთნენ.

ავსტრიაში ვიზიტის ერთ-ერთი მნიშვნელოვანი კომპონენტი, ავსტრიის სავაჭრო პალატის (WKO) მიწვევით, კურორტების განვითარების სააგენტოს სპეციალურ ბიზნესპროგრამაში მონაწილეობა იყო. სააგენტო B2B ფორმატში საკურორტო ინდუსტრიის წამყვან ავსტრიულ კომპანიებს (მათ შორის, BAGJUMP, Masterconcept Consulting GmbH, ALLEGRA Tourismus Österreich GmbH, Chalabi Architekten & Partner ZT GmbH, Zukunft Skisport) შეხვდა. საქმიან შეხვედრებზე მხარეებმა საკურორტო ინფრასტრუქტურის განვითარების შესაძლებლობები და პარტნიორობის პერსპექტივები განიხილეს.