საქართველოს კურორტების განვითარების სააგენტომ ევროპის ისტორიულ თერმულ ქალაქთა ასოციაციის საგაზაფხულო ასამბლეაზე მიიღო მონაწილეობა
13 May 2025
კურორტების განვითარების სააგენტო, წევრი ორგანიზაციის სტატუსით პირველად დაესწრო რუმინეთის საკურორტო ქალაქ ბეილე-ერკულანეში, ევროპის ისტორიულ თერმულ ქალაქთა ასოციაციის (EHTTA) საგაზაფხულო გენერალურ ასამბლეას.
კურორტების განვითარების სააგენტოს დირექტორის, ალექსანდრე ონოფრიშვილის განცხადებით, საქართველოს მონაწილეობა გენერალურ ასამბლეაზე კიდევ ერთი მნიშვნელოვანი ნაბიჯია საერთაშორისო თანამშრომლობის გაღრმავებისა და ქვეყნის სამკურნალო-თერმული რესურსების პოპულარიზაციის თვალსაზრისით.
“ასამბლეაში მონაწილეობა ქვეყანას საშუალებას აძლევს საკურორტო სფეროს განვითარების ევროპულ ინიციატივებსა და პოლიტიკის ფორმირებაში აქტიურად ჩაერთოს”, - აღნიშნა კურორტების განვითარების სააგენტოს დირექტორმა.
ასამბლეის ფარგლებში, ალექსანდრე ონოფრიშვილმა წყალტუბოს კულტურული მემკვიდრეობისა და განვითარების პერსპექტივების შესახებ პრეზენტაცია წარადგინა.
მოხსენებაში წარმოდგენილი იყო წყალტუბოს განვითარების გეგმა, კულტურული მემკვიდრეობის დაცვის, ასევე კერძო ინვესტიციების მოზიდვისა და საერთაშორისო ბაზარზე პოპულარიზაციის საკითხები.
ალექსანდრე ონოფრიშვილის მოხსენების შემდეგ, კითხვა-პასუხის ფორმატით, გაიმართა მსჯელობა. EHTTA-ს წარმომადგენლებმა აღნიშნეს, რომ საქართველოსა და რუმინეთის საკურორტო ქალაქების, წყალტუბოსა და ბეილე-ერკულანეს ბალნეოლოგიური პოტენციალი და სამკურნალო ტურიზმის ტრადიციები მსგავსია, რაც საერთო ევროპულ კონტექსტში თანამშრომლობისა და გამოცდილების გაზიარების ფართო შესაძლებლობებს ქმნის.
