კურორტების განვითარების სააგენტოს დელეგაცია „ITB ბერლინზე" საერთაშორისო პარტნიორებს შეხვდა
10 Mar 2025
კურორტების განვითარების სააგენტოს დელეგაცია მსოფლიოს უდიდეს ტურისტულ გამოფენაში „ITB ბერლინი" მონაწილეობდა. ღონისძიების ფარგლებში, სააგენტოს დელეგაციამ ბალნეოლოგიური და გამაჯანსაღებელი კურორტების მფლობელებსა და მენეჯერებთან, სხვადასხვა ქვეყნის დარგობრივი სახელმწიფო უწყებებისა და პროფესიული ასოციაციების წარმომადგენლებთან და პოტენციურ პარტნიორებთან B2B შეხვედრები გამართა.
სააგენტოს დელეგაციამ EHTTA-ს პრეზიდენტ რიკარდო მორტანდელოსთან და ასოციაციის სხვა წევრებთან თანამშრომლობის სამომავლო ხედვები და პროექტები განიხილა, ხოლო EuropeSpa-ს აღმასრულებელ დირექტორთან დოქტორ კურტ ფონ სტორჩთან შეხვედრაზე საქართველოს ბალნეოლოგიური კურორტების განვითარების შესაძლებლობებსა და სამომავლო თანამშრომლობის პერსპექტივებზე იმსჯელა.
გამოფენაზე კურორტების განვითარების სააგენტო ევროპის ისტორიული თერმული ქალაქების ასოციაციის (EHTTA) მიწვევით, ასოციაციის წევრის სტატუსით მონაწილეობდა და Medical & Health Pavilion-ის სტენდთან იყო წარმოდგენილი.
უდიდეს ტურისტულ გამოფენაში კურორტების განვითარების სააგენტოს დელეგაციის მონაწილეობა საქართველოს საერთაშორისო კომპანიებთან და ინსტიტუტებთან პარტნიორობის გაღრმავებას და საქართველოს კურორტების პოპულარიზაციას უწყობს ხელს.
„ITB Berlin" ყოველწლიურ საერთაშორისო გამოფენაზე წელს 170-ზე მეტი ქვეყანა იყო წარდგენილი და 100 ათასზე მეტი ვიზიტორი სტუმრობდა.
